საიტი მუშაობს სატესტო რეჟიმში

სამშაბათის სავაჭრო დღის მიმოხილვა

23 თებერვალი, 2022

1. დასავლეთი რუსეთს სანქციებს უწესებს, აშშ-ს საფონდო ბაზარი კი ვარდნას განიცდის

2. გასული სავაჭრო დღის მთავარი აქცენტები

3. უძრავი ქონების ფასი აშშ-ში ისტორიულ მაქსიმუმს აღწევს

4. უნიონიზაცია Apple-ში

დასავლეთი რუსეთს სანქციებს უწესებს, აშშ-ს საფონდო ბაზარი კი ვარდნას განიცდის

აშშ-ს საფონდო ინდექსები უკრაინასთან კონფლიქტში ჩაბმული რუსეთისთვის სანქციების დაწესებამ შეამცირა. რუსეთის ფედერაციის პრეზიდენტმა ვლადიმირ პუტინმა 21 თებერვალს ლუჰანსკისა და დონეცკის თვითაღიარებული რესპუბლიკების სუვერენიტეტი ცნო, რასაც დასავლეთის ქვეყნებმა რუსული ფინანსური ინსტიტუტებისა და ფიზიკური პირების მიმართ სანქციების შემოღების უპასუხეს. ამან ენერგოსექტორზე არსებითი ეკონომიკური ეფექტი იქონია, სადაც ნავთობის, ბუნებრივი გაზისა და ბენზის ფიუჩერსები 1%-ით გაძვირდა. ტრადიციულად სტაბილური ოქრო და ვერცხლი მცირედ გამყარდა, 10-წლიანი სახაზინო ობლიგაციების შემოსავლიანობა კი 1,92%-ზე დარჩა. VanEck Russia ETF, რომელიც რუსული კომპანიების ინდიკატორია, 8%-ზე მეტით დაეცა. 

აშშ-ს საფონდო ბაზარი დიდწილად აქციების მასობრივმა გაყიდვამ მოიცვა, დიდი ინდუსტრიული კომპანიების, ტექნოლოგიური ფირმებისა და ბანკების აქციები კი დაეცა. Home Depot (HD) თითქმის 9%-ით ,,ჩაიძირა’’, ვინაიდან ბინების კეთილმოწყობის კომპანიამ 2022 წლისთვის ზრდის მოკრძალებული პროგნოზი დააანონსა. Macy’s-ის (M) აქციები დაეცა, ვინაიდან სავაჭრო ცენტრების ქსელმა ელექტრონული კომერციის ბიზნესის განცალკევებაზე უარი თქვა. FAT Brands-ის აქციები 23%-ით შემცირდა, ვინაიდან მისი მშობელი კომპანიის, Fatburger chain-ის დირექტორი ენდრიუ უიდერჰორნის წინააღმდეგ ფედერალური გამოძიება დაიწყო. 

S&P 500-ის წარმატებულ აქციებს შორის Kraft Heinz-მა (KHC) ილიდერა, ვინაიდან საკვების მწარმოებელმა მოსალოდნელზე უკეთესი კვარტლური შემოსავალი გამოაქვეყნა. 

გასული სავაჭრო დღის მთავარი აქცენტები

საფინანსო კომპანია SoFi მობაილ-ბანკინგის პროგრამული უზრუნველყოფის ცენტრ Technisys-ს $1,1 მლრდ-ად შეიძენს. ეს ნაბიჯი SoFi-ს ერთიან მრავალპროფილურ პლატფორმად (one-stop shop) ტრანსფორმირებას ემსახურება. 
Tesla-ს აღმასრულებელი დირექტორი ილონ მასკი აშშ-ს ფასიანი ქაღალდებისა და საფონდო ბირჟების კომისიას (SEC) ბრალს ფედერალური გამოძიების მასალებიდან მისი კომპანიის შესახებ ინფორმაციის გაჟონვაში სდებს. მასკსა და SEC-ს შორის კონფლიქტი 2018 წელს დაიწყო, როდესაც სააგენტომ პლანეტის უმდიდრესი ადამიანი ინვესტორებისთვის ,,ცრუ ცნობების მიწოდებაში’’ დაადანაშაულა. 
Volkswagen Group სპორტული მანქანების გერმანულ ბრენდ Porsche-სთან პოტენციური IPO-ს (პირველადი საჯარო შეთავაზება) შესახებ მოლაპარაკებას აწარმოებს. ეს უკანასკნელი Volkswagen-ის ყველაზე მსხვილ აქციონერს წარმოადგენს, თუმცა საბოლოო შეთანხმება აქამდე მიღწეული არ არის. 
საინფორმაციო მედიაპლატფორმა NBC-ის (მას Сomcast ფლობს) ცნობით, პეკინში მიმდინარე ზამთრის ოლიმპიური თამაშები ისტორიაში ყველაზე დაბალრეიტინგულია - მისი ტელემაყურებლების რაოდენობამ 2018 წლის პიონგჩანგის ოლიმპიადასთან შედარებით 42%-ით იკლო, რეკლამის განმთავსებლებს კი აუდიტორიის სიმცირის გამო კი დამატებით კომერციული დრო ეძლევათ.  

უძრავი ქონების ფასი აშშ-ში ისტორიულ მაქსიმუმს აღწევს

კეის-შილერის ეროვნული საბინაო ფასების ინდექსი (S&P CoreLogic Case-Shiller National Home Price Index) აჩვენებს, რომ აშშ-ს დიდ ქალაქებში საცხოვრებელი ფართის ღირებულებამ დეკემბერში რეკორდულად მოიმატა, რაც მზარდ მოთხოვნასა და მიწოდების ლიმიტირებულ მოცულობას უკავშირდება. ამასთან, გაიზარდა იპოთეკურ სესხთა განაკვეთებიც, რაც მოგების მარჟას ამცირებს. 

2021 წლის დეკემბერში ფასის წლიურმა ნამატმა 18,8%-ს მიაღწია - მსგავსი მაჩვენებელი ინდექსის 34-წლიან ისტორიის განმავლობაში არ დაფიქსირებულა. 20 დიდი ქალაქის კომპოზიტი - 18,6%-ით (აგრეთვე რეკორდი), 10-ქალაქიანი კომპოზიტი კი 17%-ით (მეორე ყველაზე მაღალი შედეგი) გაიზარდა. ქალაქებს შორის ფენიქსი (არიზონა) ლიდერობს, სადაც ბინები 31 თვის მანძილზე 32,5%-ით გაძვირდა. მეორე-მესამე ადგილს ტამპა (+29,4%) და მაიამი (+27,4%) ინაწილებენ. 

კრეიგ ლაცარა, S&P DJI-ის ხელმძღვანელი, აღნიშნავს, რომ საცხოვრებელი ფართის ფასები უახლოეს თვეებში უფრო ნელი ტემპით, თუმცა მაინც მოიმატებს - ქირის მზარდი ხარჯი ამ ციფრებზე მალე აისახება. მანვე დასძინა, რომ გარკვეული პერიოდის განმავლობაში ორგანიზაცია მიიჩნევდა, რომ ბინების გაძვირება Сovid-19-ის პანდემიის გამო მოქალაქეთა მიერ საცხოვრებლის ინტენსიურ ცვლილებებს უკავშირდებოდა, თუმცა ამ დროისთვის ეს თეორია ჯეროვნად დასაბუთებული და მიღებული არ არის.  

უნიონიზაცია Apple-ში

Amazon-ისა და Starbucks-ის მუშები არ არიან ერთადერთნი, რომლებიც უნიონიზაციისკენ ნაბიჯებს დგამენ - Apple-ის 6-მდე საწყობისა და მაღაზიის თანამშრომელი პროფკავშირის შექმნის მოწოდებით ასევე გამოდის. აქედან მინიმუმ ორი დაწესებულების წარმომადგენლები ქვეყნის მასშტაბით კავშირის მხარდამჭერებს უკვე აგროვებენ და მალე ეროვნული შრომითი ურთიერთობების საბჭოს (NLRB) განცხადებით მიმართავენ.  

Apple აშშ-ში 70-ზე მეტ სავაჭრო ცენტრს ფლობს, რომელთა მთლიანი სამუშაო შტატი დაახლ. 65,000 ადამიანს მოიცავს. დასაქმებულთა პრეტენზია ძირითადად საათობრივ ანაზღაურებას ეხება, რომელიც Apple-ის მოგების მარჟის საგრძნობი ზრდის ფონზე არ იცვლება - ტექნოლოგიურმა გიგანტმა სექტემბერში გასული 12 თვის მანძილზე $365-მილიარდიანი შემოსავალი დათვალა, რაც 33%-იანი წლიური ნამატის შედეგი იყო. 

უნიონიზაციის მცდელობათა ფონზე კომპანიამ საცალო ვაჭრობის ქსელში ჩართული თანამშრომლებისთვის ხელფასის 2-დან 10%-მდე გაზრდის პირობა დადო. იგი ასევე აცხადებს, რომ სრული ან ნახევარი განაკვეთით მომუშავეთათვის ავადმყოფობით განპირობებულ შრომისუუნარო დღეებს ორმაგად აანაზღაურებს. გარდა ამისა, გაიზრდება როგორც ჩვეულებრივი, ისე დეკრეტული შვებულების ხელფასიც. 

თებერვალი 23, 2022

პარასკევის სავაჭრო დღის მიმოხილვა

21 თებერვალი, 2022

1. რუსეთ-უკრაინის კონფლიქტი აშშ-ს საფონდო ინდექსებს დაბლა სწევს

2. გასული სავაჭრო დღის მთავარი აქცენტები

3. Ford-ის მოდელმა ელექტრომობილების რეიტინგში Tesla-ს გადაასწრო

4. კვირის კალეიდოსკოპი

რუსეთ-უკრაინის კონფლიქტი აშშ-ს საფონდო ინდექსებს დაბლა სწევს

აშშ-ს საფონდო ბაზარმა კვირა საშუალო ვარდნით დაასრულა, რაც რუსეთსა და უკრაინას შორის გამწვავებული გეოპოლიტიკური სიტუაციის გაურკვევლობითაა გამოწვეული. თავად კვირის ბოლო სესია სამივე დიდმა ინდექსმა კლებით დაიწყო. შუადღისკენ ვარდნა მათ დროებით ზრდით გააბათილეს - S&P 500 ,,მწვანე ზონაშიც’’ კი მოექცა, თუმცა ვაჭრობის ბოლო საათებში ყველა მათგანი კვლავ შემცირდა. მომატებული ვოლატილობის გარდა, ამის მიზეზი ოფციონთა კონტრაქტებისთვის ვადის გასვლაც იყო. 

ინვესტორები კვლავ აქციებიდან ფულის გამოტანითა და ობლიგაციებში დაბანდებით იყვნენ დაკავებულნი, რაც ფასებს მაღლა სწევდა, პროცენტულ შემოსავლიანობას კი დაბლა - 10-წლიანი სახაზინო ბონდების ნიშნული 1,92%-მდე დაემცა. ამ დღეს კრიპტოვალუტების უმეტესობა მასობრივად იყიდებოდა, Bitcoin და Ether კი საგრძნობლად გაიაფდა.

Intel-ის (INTC) აქციები დაეცა მას შემდეგ, რაც ჩიპების მწარმოებელმა მოსალოდნელზე დაბალი მოგების მარჟის პროგნოზი დადო. General Electric-მა (GE) საინვესტიციო საზოგადოება წლის პირველ ნახევარში მიწოდების პრობლემების შესახებ გააფრთხილა, რის გამოც მისი აქციებიც შემცირდა. სამაგიეროდ, გაიზარდა Ford (F), რომლის აღმასრულებელი დირექტორი ჯიმ ფარლი Tesla-სა და სხვა ელექტრომანქანების მწარმოებლებთან უკეთესი კონკურენციის მიზნით ელექტრომობილთა ბიზნესის გამოცალკევებას გეგმავს. თავად Tesla 2%-ით შემცირდა. S&P 500-ის დღის ყველაზე წარმატებულ აქციებს შორის საკვების მწარმოებლები Yum! Brands (YUM), Chipotle Mexican Grill (CMG) და Domino’s Pizza (DPZ) მოხვდნენ. 
ნავთობის ფიუჩერსები მცირედით გაუფასურდა, ბენზინისა კი დაახლოებით 1%-ით გამყარდა. 

გასული სავაჭრო დღის მთავარი აქცენტები

Roku-ს (ROKU) აქციები თითქმის 26%-ით დაეცა მას შემდეგ, რაც ციფრული მედიის მოწყობილობათა მწარმოებელმა 2021 წლის მე-4 კვარტლის არადამაკმაყოფილებელი მაჩვენებლები გამოაქვეყნა და, შესაბამისად, მიმდინარე კვარტლის პროგნოზებიც გააუარესა. Roku ამის მიზეზად მიწოდების დეფიციტს ასახელებს, რამაც მთლიანად აშშ-ს სატელევიზიო ბაზარი დააზარალა. 
ბრაზილიური ხორცპროდუქტების მწარმოებელი JBS მეფრინველეობის კომპანიის, Pilgrim’s Pride-ს, დანარჩენ წილს აღარ შეისყიდის. ამჟამად JBS ამ ფირმის აქციების 80%-ს ფლობს, არსებული გარიგების მიღმა კი დამატებით 20%-ზე შეთანხმების მიღწევა ვეღარ მოხერხდა. 
,,ამერიკელი გამომცემლების’’ მიერ შემდგარი ჯგუფი Digital Content Next სენატის სასამართლო კომიტეტს ორი კანონპროექტის შემუშავების თხოვნით მიმართავს, რომელთა ამოცანა ,,ტექნოლოგიური გიგანტების’’ (Big Tech) უფრო კონკურენტულ გარემოში ჩაყენება უნდა იყოს. მათგან ერთი Apple-ისა და Google-ის ეფ-სთორების წესთა გადახედვას ითვალისწინებს. 
Tesla და მისი აღმასრულებელი დირექტორი ილონ მასკი აშშ-ს ფასიანი ქაღალდებისა და ვაჭრობის კომისიას (SEC) შევიწროებაში ადანაშაულებენ, რაც უწყების მიერ მათი საქმეების ,,დაუსრულებელ და დაუნდობელ ქექვაში’’ გამოიხატება. კომპანიის ოფიციალური პოზიციით, ეს მასკის მიერ მთავრობის დაუფარავ კრიტიკას უკავშირდება. ამის შესახებ წერილი იმავე მოსამართლეს გაეგზავნა, რომელიც 2018 წელს მასკის ,,ტვიტისა’’ და მასში გამოთქმული Tesla-ს სავარაუდო გაყიდვის საქმეს იძიებდა. კომპანია ჩივის, რომ SEC-ს სასამართლო შეთანხმების შედეგად დაკისრებული $40-მილიონიანი ჯარიმა არ გადაუხდია. 
აშშ-ს ეროვნული საგზაო უსაფრთხოების ადმინისტრაცია (NHTSA) Tesla-ს მანქანებთან დაკავშირებით კიდევ ერთ გამოძიებას იწყებს: საუბარია 416,000 ერთეულზე, რომელთა უჩვეულო, ,,ფანტომურ’’ სამუხრუჭე სისტემათა შესახებ მომხმარებლებმა უწყებას მრავალი რეპორტით მიმართეს. ეს უახლესი საქმეა მათ შორის, რომლებიც Tesla-ს მანქანათა შიდა სისტემის შესწავლას შეეხება. 
 

Ford-ის მოდელმა ელექტრომობილების რეიტინგში Tesla-ს გადაასწრო

Ford Mustang Mach-E-ს ავტომობილმა Сonsumer Reports-ის რეიტინგში პირველ ადგილზე გადაინაცვლა. ეს უკანასკნელი მონაცემთა დათვლისას ისეთ ფაქტორებს ითვალისწინებს, როგორიც, მაგ. გზებზე ტესტირება, პროგნოზირებადი საიმედოობა, მფლობელის კმაყოფილება და უსაფრთხოებაა. ბოლო 2 წლის მანძილზე რეიტინგში ლიდერობას Tesla-ს Model 3 არავის უთმობდა, წელს კი იგი მას Ford-ის მანქანამ ჩამოართვა. 

Сonsumer Reports-ის მიხედვით, Mustang Mach-E ნაკლებად ხმაურიანია და უფრო მობილურია, ვიდრე Model 3, მისი გასართობი სისტემით სარგებლობა კი ,,ბევრად მარტივია’’. მფლობელთა შორის ჩატარებული გამოკითხვის თანახმად, მისი საიმედოობაც სხვა მანქანებთან შედარებით მაღალია. 

Tesla მთლიანობაში 7 ქულით 23-ე ადგილამდე ჩამოქვეითდა (სულ რეიტინგი 32 დიდ საავტომობილო ბრენდს მოიცავს). ტოპ-ფირმებს შორის უმეტესად იაპონურ ავტომწარმოებლებს ვხვდებით. მათ შორის ყველაზე წინაა Subaru, რომელსაც Mazda, BMW, Honda და Lexus მოჰყვებიან. რაც შეეხება სიის ბოლო ადგილებს, მათ Mitsubishi, GMC და Jeep ინაწილებენ.

კვირის კალეიდოსკოპი

რუსეთსა და უკრაინას შორის არსებულმა გეოპოლიტიკურმა დაძაბულობამ აშშ-ს საფონდო ბაზარზე ვოლატილობის ზრდას ხელი შეუწყო. აშშ-ს სენატმა ხუთშაბათს მოკლევადიანი სახარჯო კანონპროექტი მიიღო, თუმცა ამ ყველაფერს ე.წ. ,,Government shutdown’’-ის (მოვლენა, როდესაც კონგრესი აღმასრულებელი ხელისუფლებისთვის ფისკალური წლისა თუ დროებითი ფინანსური ღონისძიების ფარგლებში სახსრების გამოყოფაზე შეთანხმებას ვერ აღწევს - რედ.) საფრთხის გარეშე არ ჩაუვლია, აშშ-ს ფედერალური სარეზერვო ბანკის თავმჯდომარის პოსტზე კი კენჭისყრა ჩავარდა და ჯერომ პაუელი მოვალეობათა დროებით შესრულებას კვლავ განაგრძობს - ასეთი იყო გასული ბიზნეს-კვირის შეჯამება, წინ კი ახალი კვირა ახალი დრაივერებით მოდის. 

ვოლატილობა, დიდი ალბათობით, აშშ-ს საფონდო ბაზრისთვის დამახასიათებელი ნიშანი ამ მონაკვეთშიც იქნება, რომელიც ,,პრეზიდენტთა დღის’’ გამო (21 თებერვალი) შედარებით მოკლეა. ინვესტორები ისეთ მონაცემთა გამოქვეყნების მოლოდინში არიან ელოდებიან, როგორებიცაა შემსყიდველ მენეჯერთა ინდექსი (PMI), მომხმარებელთა ნდობის ინდექსი (ССI) და სამომხმარებლო განწყობის ინდექსი (СSI). პირველ ორ  მათგანს საინვესტიციო საზოგადოება სამშაბათს, მესამეს კი პარასკევს გაეცნობა. აღსანიშნავია, რომ СSI ბოლოს დეკადის მინიმუმამდე ჩამოვიდა (61,7), რაც მომძლავრებულმა ინფლაციამ განაპირობა.  

თებერვალი 21, 2022

ოთხშაბათის სავაჭრო დღის მიმოხილვა

18 თებერვალი, 2022

1. აშშ-ს საფონდო ინდექსები ისევ შემცირდა

2. გასული სავაჭრო დღის მთავარი აქცენტები

3. Google-ის ახალი წესდება

4. DoorDash-ის აღზევება

აშშ-ს საფონდო ინდექსები ისევ შემცირდა

აშშ-ს საფონდო ბაზარი კვლავ ,,ჩაიძირა’’, ვინაიდან ინვესტორებმა აქციებიდან ფული გამოიტანეს და შედარებით სტაბილურ აქტივებზე (მაგ. ობლიგაციები) დარჩენა ამჯობინეს, ეს კი რუსეთ-უკრაინის კონფლიქტის ხელახალი ესკალაციითა და მის გარშემო ურთიერთგამომრიცხავი ცნობების გავრცელებით არის გამოწვეული. 

სელ-ოფი (აქციების მასობრივი გაყიდვა) დილიდანვე დაიწყო და სავაჭრო სესიის ბოლო საათში დაჩქარდა. განსაკუთრებით იზარალა ტექნოლოგიურმა სექტორმა: FAAMG-ის ყველა აქცია 2%-ზე მეტით დაეცა, Meta Platforms-მა (FB) კი 4%-იანი დანაკარგი ნახა. Dow-ის 30 კომპანიიდან 25-ის აქციები შემცირდა, მათ შორის კი Salesforce (CRM) გამოირჩა, რომლის ვარდნამ 5,5% შეადგინა. Caterpillar (CAT) - 4%-ით, Goldman Sachs (GS), IBM (IBM) და 3M (MMM) კი 3-3%-ით დაეცა. 

ობლიგაციების ფასმა მოიმატა, შემოსავლიანობა კი დაეცა (10-წლიანი სახაზინო ბონდების განაკვეთი - 1,96%). ოქროს ფიუჩერსები ივნისის შემდეგ რეკორდულად გაძვირდა. შვეიცარიული ფრანკი, ბრიტანული ფუნტი და იაპონური იენი, რომლებიც ,,თავშესაფრის ვალუტებად’’ ითვლება, დოლართან მიმართებით გამყარდა. 

ხორბლის ფასმა 2%-ით მოიმატა, ვინაიდან რუსეთიც და უკრაინაც მარცვლეულის მთავარი ექსპორტიორები არიან და მათ შორის საომარი მოქმედებების ნებისმიერი სახით დაწყება მიწოდებაზე უარყოფით გავლენას იქონიებს. გეოპოლიტიკურმა დაძაბულობამ კრიპტოვალუტების მასობრივი გაყიდვა განაპირობა, ვინაიდან ისინი უფრო სარისკო ინვესტიციებად ითვლება.

გასული სავაჭრო დღის მთავარი აქცენტები

Nvidia-ს კვარტლური გაყიდვებისა და მოგების მაჩვენებელმა ანალიტიკოსთა მოლოდინებს გადააჭარბა. კომპანიის მიმდინარე კვარტლის პროგნოზებიც ასევე გაუმჯობესდა. ჩიპების მწარმოებელმა თავისი ონლაინ-თამაშების, მონაცემთა ცენტრისა და პროფესიული ვიზუალიზაციის ბიზნესებში რეკორდული შემოსავალი ნახა. 
Сisco-ს (СSCO) აქციები 3%-ზე მეტით გაიზარდა მას შემდეგ, რაც ქსელური კავშირგაბმულობის კომპანიამ სოლიდური კვარტლური მოგება დააფიქსირა და მიმდინარე ფისკალური მონაკვეთის პროგნოზები გაიუმჯობესა. ამასთან, ვრცელდება ცნობები, რომ Сisco მონაცემთა ანალიზის ფირმა Splunk-ის შესასყიდად მოლაპარაკებებს აწარმოებს. 
Amazon და Visa საკრედიტო ბარათებზე მიბმულ სახელფასო საკითხებზე დავობენ - Amazon ცდილობს, Visa ანაზღაურების შემცირებაზე დაითანხმოს, რათა გარიგების თანახმად დიდ ბრიტანეთში მცხოვრებმა მომხმარებლებმა Visa-ს ბარათებით მისი პროდუქციის შეძენა შეძლონ. გარდა ამისა, Amazon-ს სურს, რომ ამ გზით ზოგიერთ ქვეყანაში არსებული დამატებით გადასახადი გაუუქმდეს. 
აქტივისტმა ჰეჯ-ფონდმა Alta Fox Capital Management-მა Hasbro-ს ბორდში ხმის მიცემის პროცესის გასაკონტროლებლად ბრძოლა დაიწყო. Alta-ს ბორდში რამდენიმე დირექტორის დამატება სურს, თავად კი სათამაშოების მწარმოებლის კორპორატიულ გაყოფას მხარს უჭერს - ასეთ შემთხვევაში, ამ უკანასკნელს სწრაფად მზარდი ონლაინ-თამაშების (Dungeons & Dragons) ბიზნესი განეყოფა.

Google-ის ახალი წესდება

Alphabet-ის საკუთრებაში მყოფი Google კონფიდენციალურობის ახლებური წესების შემოღებას გეგმავს. მსგავსი იდეა აქამდე Apple-ს აქვს გაჟღერებული, რომელსაც თავის ,,ანდროიდის’’ მოწყობილობებზე აპლიკაციების მეშვეობით თვალყურის დევნების, ე.წ. ტრეკინგის აღკვეთა სურს. 

სარეკლამო შემოსავალზე დამოკიდებული კომპანიებისთვის კარგი ამბავი ისაა, რომ Google ტრეკინგის ახლანდელ ტექნოლოგიას მინიმუმ კიდევ ორი წლის მანძილზე შეინარჩუნებს. Google-მა განაცხადა, რომ ,,ამ სისტემის გაუქმების არსებითი სიგნალი ამ ამბამდე ცოტა ხნით ადრე გავრცელდება’’.  

მიუხედავად ამისა, საძიებო პლატფორმა ხაზს უსვამს, რომ სარეკლამო ID-ების ალგორითმები მათი კონფიდენციალურობის გაზრდის მიზნით დაიხვეწება. Apple-ის მსგავსმა ნაბიჯმა ციფრული რეკლამირების ბიზნესს სერიოზული დარტყმა მიაყენა და Meta Platforms-ს (FB) მილიარდობით დოლარი დააკარგვინა. 

ამ უკანასკნელმა თავის დროზე პირდაპირ მიუთითა, რომ Apple-ის მიერ მიღებული ცვლილებები მისი წლევანდელი გაყიდვების მოცულობას დაახლოებით $10 მლრდ-ით შეამცირებს. აღსანიშნავია, რომ Apple-ის მიერ მიღებულ ზომებთან ბრძოლის მიუხედავად, Facebook-მა Google-ის პოლიტიკას მხარდაჭერა გამოუცხადა და მას ,,გრძელვადიანი და თანამშრომლობითი’’ უწოდა. 

Google-ისთვის კონფიდენციალურობის პრაქტიკაზე ორიენტირებას მეორე მხარეც აქვს: ეს მას სახელმწიფო რეგულირების ორგანოებთან პრობლემების შექმნისგან თავის არიდებაში დაეხმარება. უკანასკნელ პერიოდში სულ უფრო მოსალოდნელია, რომ აშშ-ში არსებული ფედერალური საკანონმდებლო ბაზა პერსონალური მონაცემების გამოყენების კუთხით რიგ ცვლილებებს განიცდის.  

DoorDash-ის აღზევება

DoorDash-მა (DASH) 2021 წელს შემოსავლების მხრივ პანდემიური პერიოდის რეკორდი დაამყარა: 2020 წელთან შედარებით ეს მაჩვენებელი 70%-ით გაიზარდა და თითქმის $5 მლრდ-ს მიაღწია. ბოლო ფისკალურ კვარტალში იგი $1,3 მლრდ-ით განისაზღვრა, რაც წინა წლის ამავე მონაკვეთში არსებულ შემოსავალს 34%-ით აღემატება. ჩინებული კვარტლური შედეგების გამოქვეყნებას მისი აქციების ,,ცაში აჭრა’’ მოჰყვა. 

ადგილზე მიტანის სერვისმა, რომელიც პანდემიისდროინდელი ,,დარჩი სახლშის’’ ტენდენციის ერთ-ერთი ყველაზე დიდ ბენეფიციარს წარმოადგენდა, გასული წლის ბოლოს შეკვეთების დიდი რიცხვი და ახალი მომხმარებლები წარმოადგინა. DoorDash-ის მონაგარმა დაახლოებით 370 მლნ შეკვეთა მოიცვა, ანალიტიკოსები კი 360 მლნ-ს ვარაუდობდნენ. 

კომპანიამ სახლში მიტანის სერვისებზე მზარდი მოთხოვნით ისარგებლა, რა დროის მანძილზეც იგი მომხმარებლებს ყვავილებს, შინაური ცხოველების საკვებს, ალკოჰოლსა და სასურსათო პროდუქტებს აწვდიდა. DoorDash-მა ამ ასევე ლოჯისტიკური ტიპის პარტნიორული შეთანხმება გააფორმა ისეთ საცალო ვაჭრობის პლატფორმებთან, როგორებიცაა Walmart და Macy's - მისთვის განკუთვნილი შეკვეთები მათ ვებ-გვერდებზე თავსდება.  

აღსანიშნავია, რომ DoorDash კვლავ ,,წითელ ზონაში’’ იმყოფება, ვინაიდან მისი ზარალი მე-4 კვარტალში $155 მლნ-ს ითვლის, თუმცა ეს 2020 წლის მაჩვენებელზე ($312 მლნ) გაცილებით ნაკლებია. კომპანიის საჯარო დებიუტი 2020 წლის დეკემბერში შედგა, რომლის საწყის ნიშნულთან მიმართებით აქციების ვარდნა ამჟამად 50%-ს შეადგენს.

თებერვალი 18, 2022

ოთხშაბათის სავაჭრო დღის მიმოხილვა

17 თებერვალი, 2022

1. აშშ-ს ფედერალური სარეზერვო ბანკი ხისტი მოქმედებისგან თავს იკავებს

2. გასული სავაჭრო დღის მთავარი აქცენტები

3. Virgin Galactic-ის აღზევება

აშშ-ის საფონდო ბაზარმა სესიის ადრეულ სტადიაზე განცდილი დანაკარგები გააბათილა და საბოლოოდ დღე თითქმის ნულოვანი ნამატით დაასრულა. ინდექსების დინამიკა დიდწილად ფედერალური საზერვო ბანკის ბოლო სხდომას უკავშირდება, რომელმაც აჩვენა, რომ მონეტარული პოლიტიკის მამები ინფლაციის აღსაკვეთად უფრო აგრესიული ნაბიჯების გადადგმისგან თავს იკავებენ. ისინი ამბობენ, რომ უახლოეს მომავალში პროცენტული განაკვეთების ასაწევად და ბანკის ხარჯთაღრიცხვის ბალანსის შესამცირებლად მზად არიან, ინვესტორები კი ამ კომენტარებს ხისტ მოქმედებაზე უარის თქმის ნიშნად იღებენ. შედეგად, ისინი მშვიდდებიან და აქციებში ფულის დაბანდებას განაგრძობენ.

10-წლიანი სახაზინო ობლიგაციების შემოსავლიანობამ იკლო, ინვესტორთა ყურადღება კი ტექნოლოგიურმა სექტორმა მიიპყრო, რომლის მიმზიდველობას დაბალი სასესხო ხარჯები განაპირობებს. Nasdaq დაახლოებით 200 პუნქტით შემცირდა, შემდეგ კი გაიზარდა და საბოლოოდ დღე 0,1%-იანი კლებით დაასრულა.

Generac-ის (GNRC) S&P 500-ის ყველაზე წარმატებული აქციის წოდება Generac-ს (GNRC) ერგო, რომელმაც მოსალოდნელზე უკეთესი კვარტლური ციფრები გამოაქვეყნა. სოლიდური მოგებით გამოირჩა Kraft Heinz-ის (KHC) აქციებიც.

ViacomCBS-ის (VIAC), აწ უკვე Paramount-ის, აქციები, დაეცა, რაც მედიაკომპანიის არადამაკმაყოფილებელმა კვარტლურმა შედეგებმა გამოიწვია. ამასთან, მან განაცხადა, რომ სხვა სტრიმინგ-სერვისებთან უფრო ძლიერი კონკურენციის გასაწევად მეტი ხარჯის გაღება მოუწევს. წარუმატებელი დღე გამოდგა ელექტრონული კომერციის პლატფორმა Shopify-სთვისაც (SHOP), რომელმაც საინვესტიციო საზოგადოება წლის პირველ ნახევარში შემოსავლების შემცირების შესახებ გააფრთხილა.   

ნავთობის ფიუჩერსის 1 ბარელი დღის პირველ ნახევარში 95 დოლარად იყიდებოდა, შემდეგ კი კურსი შეიცვალა და $92-იან ნიშნულს ჩამოსცდა. ამის მიზეზი უკრაინაში რუსეთის არმიის შეჭრის შესაძლო საფრთხის შესახებ გავრცელებული არაერთგვაროვანი ცნობები და შეერთებული შტატების მცდელობებია, რათა ახლო აღმოსავლეთის ქვეყნები მეტი ნედლი ნავთობის მიწოდებაზე დაიყოლიოს.

Ether-ისა და სხვა ძირითადი კრიპტოვალუტების ფასი ფედერალური ბანკის სხდომის დასრულების შემდეგ გაიზარდა.

 

გასული სავაჭრო დღის მთავარი აქცენტები

 

· რესპუბლიკელმა სენატორებმა აშშ-ს პრეზიდენტ ჯო ბაიდენის მიერ შემოთავაზებული კანდიდატის ფედერალური სარეზერვო ბანკის თავმჯდომარეობის პოსტზე არჩევა დაბლოკეს - ,,სპილოები’’ სარა ბლუმ რასკინის შეხედულებებთან არსებულ ინტერესთა კონფლიქტზე მიუთითებენ. 

· Airbnb-ის (ABNB) აქციები 3,5%-ით გაიზარდა, ვინაიდან ავიაკომპანიამ გასულ წელს რეკორდული შემოსავლის დაფიქსირების შესახებ გამოაქვეყნა. ამასთან, მან პანდემიის დაწყების შემდეგ ცალკეულ ფისკალურ კვარტალში ჯავშნების მოსალოდნელი მაჩვენებელი პირველად გააუმჯობესა. Airbnb-ის ამა წლის პერსპექტივა ეპიდსიტუაციის გაუმჯობესების ფონზე კიდევ უფრო ოპტიმისტურია.

· Roblox-ის (RBLX) აქციები 16%-ით დაეცა, ვინაიდან ონლაინ-თამაშების პლატფორმამ ანალიტიკოსთა პროგნოზებზე უარესი კვარტლური მონაცემები (გაყიდვები, მოგება) წარმოადგინა. ამავდროულად, მისი ყოველდღიური აქტიური მომხმარებლების რიცხვი წლიდან წლამდე 33%-ით გაიზარდა.

· სასამართლოს დადგენილებით, Altria Group-ს ანტიტრესტული კანონები არ დაურღვევია, როდესაც მან 2018 წელს ელექტროსიგარეტის სტარტაპ Juul Labs-ის საკონტროლო პაკეტი შეისყიდა. მოსამართლემ აშშ-ს ფედერალური სავაჭრო კომისიის (FTC) არგუმენტები საკმარისად არ მიიჩნია და კომპანიას Juul-თან გარიგების გაგრძელების შესაძლებლობა მისცა.

· Cedar Fair-მა SeaWorld Entertainment-ის მიერ შემოთავაზებული $3,4 მლრდ-ად შესყიდვის წინადადება უარყო. SeaWorld მიიჩნევს, რომ ორი თემატური პარკის გაერთიანება ამ გარიგების ჩაშლის შემთხვევაში რთულად წარმოსადგენია.

 

Virgin Galactic-ის აღზევება

 

Virgin Galactic-ის (SPCE) აქციები 16 თებერვლის სესიაზე თითქმის 32%-ით გაიზარდა მას შემდეგ, რაც კომპანიამ გამოაცხადა, რომ ფართო საზოგადოება მალე მისი კოსმოსური ფრენების ბილეთებით ისარგებლებს.

ბილეთის საშუალო ფასი $450,000-ია. ამის გარდა, იგი $150,000-იან დეპოზიტს საჭიროებს. კომპანიის აღმასრულებელმა დირექტორმა მაიკლ კოლგლაზიემ განაცხადა, რომ Virgin კომერციულ მომსახურებას წლის ბოლოსთვის შეუდგება და დასაწყისისთვის ბორტზე 1,000 ტურისტის ყოლას გეგმავს.

Virgin Galactic-ის აქციების ზრდამ გასული წლის ივლისში რეკორდულ ნიშნულს მიაღწია, როდესაც მისი დამფუძნებელმა რიჩარდ ბრენსონმა კოსმოსში პირველი საჩვენებელი გასეირნება მოაწყო. ამის შემდეგ კოსმოსური ხომალდის ტესტირებათა პროცესი რამდენჯერმე შეფერხდა, აქციები კი ნელ-ნელა შემცირდა და უკანასკნელ პერიოდამდე თავის ისტორიულ მაქსიმუმს 80%-ით ჩამორჩებოდა.

ბოლო ათწლეულის მანძილზე Virgin-ის ეგიდით გასამართ ფრენებზე 600-მდე ადგილი დაიჯავშნა. ბილეთების საშუალო ფასი $200,000-დან $250,000-მდე მერყეობდა. რაც შეეხება ამჟამინდელ ჯავშნებს, მათი რიცხვის ზრდის ტემპი კოსმოსური ტურიზმისა და Virgin Galactic-ის ბიზნესის მიმართ საზოგადოების არსებული ინტერესის ინდიკატორი უნდა გახდეს.

 

 

თებერვალი 17, 2022

სამშაბათის სავაჭრო დღის მიმოხილვა

16 თებერვალი, 2022

1. აშშ-ს საფონდო ბაზარმა ვარდნა შეწყვიტა

2. გასული სავაჭრო დღის მთავარი აქცენტები

3. ნავთობის ფასი პიკის მიღწევის შემდეგ მცირდება

4. ილონ მასკის საქველმოქმედო შემოწირულობანი

აშშ-ს საფონდო ბაზარმა ვარდნა შეწყვიტა

აშშ-ს საფონდო ბირჟები სამდღიანი ვარდნის შემდეგ მზარდ დინამიკას დაუბრუნდნენ, რაც უკრაინაში რუსეთის არმიის შეჭრის საფრთხის შესაძლო განეიტრალებით აიხსნება. რუსეთის ფედერაციის პრეზიდენტმა ვლადიმირ პუტინმა განაცხადა, რომ ზოგიერთი საჯარისო შენაერთი უკრაინის საზღვრის ახლომდებარე ტერიტორიას ტოვებს, რაც ინვესტორებმა უფრო სტაბილური ობლიგაციებიდან ფულის გამოტანისა და აქციებში დაბანდების ნიშნად აღიქვეს. აშშ-ს 10-წლიანი სახაზინო ობლიგაციების შემოსავლიანობა 2,04%-ს გაუტოლდა, რამაც საფინანსო სექტორის კომპანიათა აღმავლობას ხელი შეუწყო.

ნავთობის ფიუჩერსები თითქმის 3%-ით გაიაფდა, რაც უკრაინაში ომის დაწყებისა და მიწოდების კლების საშიშროების შემცირებამ განაპირობა. ამან ავიაკომპანიებისა და საკრუიზო ხაზების აქციათა ზრდას ხელი კიდევ უფრო შეუწყო, ენერგოსექტორმა კი, პირიქით, ვარდნა განიცადა. 

Dow-ს აქციებიდან 4 კომპანიის გარდა ყველამ მოიმატა. მათ სათავეში Salesforce (CRM) და Boeing (BA) ჩაუდგნენ: ორივე მათგანი 3%-ზე მეტით გაიზარდა. კარგი დღე გამოდგა FAAMG-ის ფირმებისთვისაც, განსაკუთრებით კი Apple-ისთვის (AAPL), რომლის აქციები 2%-ზე მეტით გამყარდა. Tesla (TSLA) 5%-იანი ნამატით გამოირჩა. 

დღის მთავარი გმირი კი კოსმოსური ტურიზმის კომპანია Virgin Galactic (SPCE) გახდა, რომელმაც გამოაცხადა, რომ სუბორბიტული ფრენებისთვის ბილეთების გაყიდვა 17 თებერვლიდან დაიწყება. ამ ცნობის შემდეგ მისი აქციები მაღლა 32%-ით ,,აიჭრა’’. 

გასული სავაჭრო დღის მთავარი აქცენტები

Intel კომპიუტერული ჩიპების მწარმოებელ Tower Semiconductor-ს (TSEM) $5,4 მლრდ-ად შეიძენს. ამ უკანასკნელის პროდუქცია როგორც ავტომობილებში, ისე სამედიცინო და ინდუსტრიულ აღჭურვილობებში გამოიყენება. სიახლეს Tower-ის აქციათა 40%-იანი ზრდა მოჰყვა. 
აშშ-ს სენატის საბანკო კომიტეტი ფედერალური სარეზერვო ბანკის მომდევნო თავმჯდომარის ვინაობის დასასახელებლად ემზადება - კანდიდატებს შორის უწყების მოქმედი ხელმძღვანელი ჯერომ პაუელი, ასევე ლეილ ბრენარდი (სხვადასხვა ცნობით ბაიდენის ფავორიტი), ლიზა კუკი, ფილიპ ჯეფერსონი და სარა ბლუმ რასკინი არიან.  
ტეხასის გენერალურმა პროკურორმა Meta-ს Facebook-ის წინააღმდეგ სარჩელი მოამზადა, რომლის მიხედვით სოციალური მედიის გიგანტმა კონფიდენციალურობის დაცვის ადგილობრივი წესები დაარღვია: საუბარია ამჟამად დისფუნქციურ სახის ამომცნობ ტექნოლოგიაზე, რომელმაც ტეხასის მილიონობით რეზიდენტის ბიომეტრული მონაცემები მათი თანხმობის გარეშე მოიპოვა. 
Ford Motor აცხადებს, რომ მისი ქარხნების დახურვა გაგრძელდება, რაც ნახევარგამტარი ჩიპების გლობალური დეფიციტის სიმწვავით არის გამოწვეული. გასულ ექვსდღიან მონაკვეთში ავტომწარმოებელმა ჩრდ. ამერიკაში 8 ქარხნის მუშაობა გააჩერა, ამჟამად კი იგივეს ოჰაიოსა და კანზას-სიტიში გეგმავს. 
Microsoft თანამშრომელთა სამსახურებში დაბრუნებას თებერვლის ბოლოსთვის გეგმავს. კომპანია ვაშინგტონის შტატში (ქ. სიეტლში მისი სათავო ოფისი მდებარეობს) არსებულ ეპიდემიოლოგიურ მონაცემებს ეყრდნობა, რომელიც ვაქცინაციის ტემპის ზრდასა და ჰოსპიტალიზაციის მაჩვენელის შემცირებაზე მიუთითებს. 

ნავთობის ფასი პიკის მიღწევის შემდეგ მცირდება

,,შავმა ოქრომ’’ შვიდწლიანი მაქსიმუმის დაფიქსირების შემდეგ უკან დაიხია, რაც აღმოსავლეთ ევროპის რეგიონიდან მომავალ ცნობებს უკავშირდება: რუსეთმა უკრაინის საზღვართან ახლოს კონცენტრირებული ზოგიერთი საჯარისო შენაერთი კონფლიქტის ზონიდან გაიყვანა. ვითარების შესაძლო განმუხტვის ნიშნებმა თავი ნავთობის დინამიკაშიც იჩინა - 15 თებერვალს 1 ბარელი 2014 წლის შემდეგ ყველაზე მაღალ, $100-იან ნიშნულს მიუახლოვდა, დღეს კი მან უკვე კლება დაიწყო.

რუსეთი მსოფლიოში ,,შავი ოქროს’’ სიდიდით მესამე ექსპორტიორია, რომელიც ყოველდღიურად 5 მლნ ბარელ (მთლიანი პროდუქციის თითქმის 12%) ნედლ ნავთობს აწარმოებს. გარდა ამისა, იგი დანარჩენ ქვეყნებს სხვა ტიპის კიდევ 2,5 მლნ ნავთობპროდუქტს აწვდის, რაც გლობალური მოცულობის დაახლოებით 10%-ს შეადგენს. რუსეთის უმთავრეს ბაზარს ევროპა (დაახლ. ექსპორტის 60%) და ჩინეთი (30%) წარმოადგენს. 

რუსეთის ეკონომიკა საწვავის გასაღებაზე დიდად არის დამოკიდებული, რაც იმას ნიშნავს, რომ ნაკლებად სავარაუდოა, ,,საპასუხო დარტყმის’’ მიყენების მიზნით ქვეყანა  ნავთობის ექსპორტის განახევრებაზე თანახმა იყოს. თუ რისამე პროდუქცია შემცირდა, ეს, უპირველესად, ისევ ბუნებრივი გაზი იქნება, რომლის მიწოდებაც უკრაინის გავლით ხორციელდება. რუსეთი მეზობლებს დღეში 651 მლნ კუბურ მეტრ გაზს აწვდის, რაც გლობალური მოცულობის 25%-ია. ამ პროდუქციის 85% ევროპაში მიდის.  

უკრაინის ტერიტორიაზე მოქმედი მილსადენი საშუალოდ ყოველდღე 113 მლნ კუბურ მეტრ გაზს ატარებს, თუმცა ამჟამად იგი თავისი ტევადობის ნახევრით ოპერირებს. შემცირებული მიწოდების გამო ევროპაში ბუნებრივი გაზის ფასმა რეკორდულ ნიშნულებს მიაღწია. 

ილონ მასკის საქველმოქმედო შემოწირულობანი

Tesla-ს აღმასრულებელმა დირექტორმა ილონ მასკმა 2021 წელს ქველმოქმედების სახით ავტომწარმოებლის დაახლ. $6 მლრდ-ად შეფასებული აქციები გაიღო, რაც წლის ერთ-ერთი ყველაზე მსხვილი საქველმოქმედო შემოწირულობაა. ეს აშშ-ს ფასიანი ქაღალდებისა და ვაჭრობის კომისიის (SEC) დოკუმენტებით დასტურდება, რომლის მიხედვით 19-29 ნოემბრის ფარგლებში მასკმა ანონიმურ საქველმოქმედო ორგანიზაციას (თუ ორგანიზაციებს) 5,044,000 აქცია გადასცა, რომელთა საერთო ღირებულება $5,74 მლრდ-ს აღწევს. დონორის სახელდება ამ დოკუმენტებში არ ჟღერდება. 

დონაცია ორთვიან პერიოდს მოიცავდა, რომლის მანძილზე მასკმა კომპანიის $16,4 მლრდ-ად ღირებული აქციები გაყიდა. მანამდე მან საკუთარი Twitter-ის გვერდის გამომწერთა შორის ონლაინ-გამოკითხვა ჩაატარა, რომელიც მისი წილის 10%-ის გასაღებას ეხებოდა.

აქციების საჩუქრად გაცემა მასკისთვის დაკისრებულ ფედერალურ საშემოსავლო გადასახადს შეამცირებს. დეკემბერში მან განაცხადა, რომ ეს თანხა $11 მლრდ-ს აღემატებოდა, რაც ისტორიაში აქამდე ინდივიდუალურ პირს ჯერ არ გადაუხდია. 

,,ფილანთროპიის ქრონიკების’’ (Chronicle of Philanthropy) გამომცემლობის თანახმად, 2021 წელს მასკზე მეტი თანხა საქველმოქმედო ფონდებისთვის მხოლოდ ბილ და მელინდა გეითსებმა ($15 მლრდ) გაიღეს. 

თებერვალი 16, 2022